Þekktir vindlaáhugamenn

Charles Barkley OG MEISTARATITILLINN

Michael Jordan er mikill áhugamaður um vindlareykingar og fékk sér alltaf vindil þegar hann fagnaði meistaratitli í NBA körfuboltanum. Margir fleiri körfuboltamenn hafa látið eftir sér að fá sér einn í búningsklefanum eftir góðan sigur. Lebron James kveikti í vindli á blaðamannafundi eftir að hafa hampað meistartitlinum árið 2016. Hann fékk sér svo vindil í búningsklefanum eftir að hann vann titilinn með Los Angeles Lakers þann 12. október síðastliðinn. Hann hafði ærna ástæðu til þess að fagna enda var hann valinn MVP.

Fleiri NBA leikmenn hafa áhuga á vindlareykingum, til dæmis Stephen Curry, Karl Malone, Dominique Wilkins og Shaquille O‘Neal. Phil Jackson, þjálfari, sást auðvitað líka oft með vindil. Og Charles Barkley finnst líka gott að reykja vindla. Hann þakkar Michael Jordan það að hafa kynnt hann fyrir vindlareykingum. Barkley var valinn MVP árið 1993 en það var árið sem Phoenix Suns tapaði á móti Jordan og Chicago Bulls í úrslitunum. Það var árið sem Barkley komst næst því að lyfta titli en honum tókst aldrei að vinna meistaratitil.

Barkley er í dag einn af stjórnendum þáttarins Inside the NBA en hann er líka mikill áhugamaður um golf. Hann var einn af nokkrum sem lýstu einstakri golfviðureign Tiger Woods og Peyton Manning á móti Phil Mickelson og Tom Brady. Hann lýsti reyndar líka einvígi Tiger og Phil sem var það fyrsta í þessari merkilegu mótaröð. Nú er búið að tilkynna að þriðja golfviðureignin, Match 3, er á næsta leyti en hún verður haldin þann 27. nóvember næstkomandi. Keppendur í þetta skiptið verða Phil Mickelson, Stephen Curry, Peyton Manning og Charles Barkley sjálfur. Mickelson og Barkley verða saman í liði en það þarf örugglega að gefa Barkley einhverja góða forgjöf því sveiflan hans er ein sú furðulegasta sem hefur sést. Það hefur meira að segja verið framleidd heil þáttaröð um hvernig á að laga sveifluna hans og í hana voru fengnir bestu fáanlegu golfsveifluþjálfarar í heimi. Það tókst ekki að laga hana.

En þetta gæti verið tækifæri Barkley til þess að lyfta meistaratitli. Það hefur verið nóg af skemmtilegu og góðlátlegu gríni og skítkasti í þessum golfviðureignum og sú sem er framundan virðist ekki ætla að vera nein undantekning. Phil Mickelson er þegar byrjaður að moka og það yfir meðspilara sinn.

„And Charles, out of the three of us, has not really won his championship. Peyton’s won Super Bowls, I’ve been able to win some majors on tour, Steph’s won the NBA Championship. Charles never did. Now, he won the gold medal in the Olympics, but I view this as a chance for him to finally get his championship.“

Barkley reykir oft vindla þegar hann spilar golf og hann spilar mikið golf. Hann reykir helst Kúbuvindla en er líka hrifinn af Padrón vindlum frá Nicaragua. Hann geymir vindlana sína í fjórum rakaskápum heima hjá sér og segist hafa vanmetið hvað hann á marga vindla. Hann sé að vinna í því að fá sér einn stóran skáp sem rúmar alla vindlana. Honum er annt um að hafa þessa hluti í lagi og segist koma betur fram við vindlana sína heldur en fólk.

Við óskum Sir Charles góðs gengis í einvíginu og vonum svo sannarlega að nú sé komið að honum að vinna sinn meistaratitil og fagna honum með því að kveikja í einum vel völdum Cohiba vindli.

Leave a Reply